آزاد تبریز- سرنسرلي
چيلله يه ايكي هفته قاليردي كي منه بئله بير سؤال وئرديلر نه اوچون چيلله نين ايلك آخشامي قارپيز كسيرلر بو عادت، عنعنه و ائل مراسيمي هاردان قالير نئجه يارانيب نه سبب لره گؤره پاييزين آخير گئجه سي و يا خود ايلين اوزون گئجه سينده ائللرماراقلي بير مراسم كئچيره رك- قارپيز كسيل لر؟
سؤزون دوزونه دورسان من بو سورغولار قاباغيندا بير سؤز تاپابيلمه ديم آنجاق سوز وئرديم كي هرياندان اولورسا اولسون بوباره ده آختاريب آراييب اونون اوچون بير پارا معلوماتلار توپلايام آختاريب بواوغور تائيليت لر الده ائده بيلمه ديم آخير قوجومان عميميز ائلين طايفانين سئويمليسي اؤز دوشونجه لريني بيزيم اختيار يميزدا قويماغي وعد ائتدي و دئدي كي چيلله گئجه سي بير يئره توپلانديغيمير گون و چيلله نين اوز گئجه سينده سيزين اوچون دانشيرام.
آنجاق ائل سؤزونو ائلدن گيزلتمك اولماز- دئيه- بو خصوصدامنه معلوماتي نين ضروري اولدوغو گوروب سؤزه باشلادي…
روايته گؤره ائلين- يوردون زحمت چكن قولو قوه لي بير ايگيدي اوو اوولاماغا چيخير اوگونكي پاييز- چول- پالازين ييغيشديريب همين گئجه وداعلاشماق ايسته يير آنجاق هاوانين سويوقلوغواونو آت اويناتماقدان قامچي گزديرمكدن چكينديره بيلميردي بو حالدا اونون قاباغينا جاني قاردان اولان اوزون جثه لي شاختا بابا چيخير شاختا بابا بو آدما دئييركي هه اوغول ياخشي كي سني گؤردوم چونكي دئمه يه بير نئچه سؤزوم واردي جؤمرود دايگيد آت بئليندن انيب شاختا باباني اورهك آچيقليغي ايله سالاملايير و سونرا شاختا بابايا دئيير: هه شاختا بابا خئير اولا. سؤزون نه دي؟ دئيه سوروشاندا شاختا: هه اوغول گئت بوندان سورا اووچولوغا چيخما چونكي بو يئرلرده من اولاجاغام اونسوزدا مينم سويوغوما تاب گتيره بيلمه ييب محو اولوب گئده رسن بو گوندن منيم سؤزومو قولاغوندا سيرغا ائله- ييب ساخلا و بوتون ائللره سؤيله كي صاباحدان اوجاق- باشيندان كوروسو باشيندان ائشيگه چيخماسينلار.
جاوان بو سؤزله راضي لاشمير اوچوخ دئيير بو آز ائشيدير نهايت ايگيد آتينا بير قامچي و ورب، شاختابابادان و داعلاشمادان آيريلير او بير آز يول گئده ندن سونرا گؤرور اونون يولونون اوستونده ايكي نفر دايانيب ياخينلاشيب گؤروركي اولارين بيريسي بؤيوك چيلله، بيري ده كيچيك چيلله دير اول بؤيوك چيلله شاختا بابانين سؤزلريندن بير نئچه سيني بو آداما دئييب قورتاراندان سورا علاوه اورلاق سويله يير:
منيم امريمله بوگوندن اعتبارا كورسولر قورولمالي دير پينجلر يانيب اوجاقلار آليشمالي دير هامينيزا، اوجاق باشيندان كورسو قير اغيندان پينج يانيندان چكيله بيلمه يه جكسيز چونكي من ائله بير شخصم كي منيم اليمدن اوشاقلاردا بويوك لرده آماندا قالماباجاق سؤزكيچيك چيلله يه چاتير ايندي گلين گؤرهك كيچيك چيلله بو آداما نه دئيير:
هه بؤيوك چيلله نين يقين سؤزلرين ائشيتديزكي، دئدي منيم امريمله گرك كورسولر قورولسون اوجاقلار آليشسين هئچ كيم اولاردان يانا چكيلمه سين آمما من ده او رحم ائله مه نازچكمه اولماياجاق چونكي مندن هئچ كيمسه آماندا قالمامالي دي من گرهك اوجاقلاري اوز سؤيوغوملا سؤندوروب پينج ايستيسيني خفه له ييب كورسولرده آداملاري بئشيكده ده اوشاقلاري دوندورواجاغام دئيه ايگيده يول وئردي كيچيك چيلله هله ليك بير دومان كيمي گوزدن ايتدي بؤيوك چيلله يولون بير آز او طرفينده دوروب داياندي.
ايگيد كنده قاييداركن يولدا فيكيرلشدي كي نئينه سين بويكه ايشين عهده سيندن نئجه گله جكلر عاغيللي گنج بوقرارار گلدي كي او ائوينه دونمه ميش گئتسين ائل آغ ساققالي ايله دانيشسين گؤروسون كي اونه تدبير تؤكور بئله ده اولور. ائل كندين كيشي لري بير يئره ييغيشديلار آغ ساققال قيشدان قور خانلارا اورهك وئريب گوجسوزلره بخش ائيديكدن سورا هاميني احتياطلي اولماغا اؤزلريني شاختادان و چيلله نين آمانسيز سويوغوندان قوروماغا سسله دي نهايت تكليف ائتدي بوگون هامي ائوينه قارپيز آليب بو سويوقلوق ميوه سي ايله چيلله نين قاباغيندا دايانسينلار.
بيرده دئيير لركي قوجانين بو سؤزوندن شاختا بابا و هر ايكي چيلله ال- اله وئريب قوجانين جانيني آلديلار اونلار قوجاني يوخ ائتسه ده اونون اؤيودلري تپرلي سؤزلري بوتون ائله ياييلدي هامي گوندوزو گئجه ائله ييب چيلله گئجه سي نين پيشوازينا گئتدي هر بير ائوده چيلله سفرهسي آچيلدي مختلف خورهك لر لذيذيئمك لرين يانيندا چيلله قارپيزي داگؤروندو بوتون عائله عضولري ايستر قادين ايستر كيشي ايستر اوشاق و ايستر سه ده جاوان اولسون چيلله قارپيزي يئييب دئديلركي بوتون دونيا و عالم بيلسين شاختا بابا، كيچيك چيلله بؤيوك چيلله گؤر سون كي بيز ائلين بو يوردون جاماعاتي ايله بواوزون گئجه سيينده نه اينكي اؤزوموزو ايستي - ه وئريب قورويوروق بلكه سويوقلوق ميوه سي اولان قارپيزي يئييب اونلارا آنديريريق كي اليندن گلني بئش قابا چك چونكي بيزي بو سؤزلر قور خودا ابيلمز حورمتلي اوخوجولار بو بير روايت ديركي چيلله قارپيزين حكمتي باره دير.
