| تبليغات | X |
26 آذر، كيتابلاريميزين يانديريلان گونو و بيربيريميزه كيتاب سونما(1) گونو
آيتان تبريزلي (آذراوغلو)
63 ايل بوندان اؤنجه (21 آذر 1324-ده) آذربايجان دا ميلي حكومت قورولدو. ميلي حكومت و اونا داياق اولان آذربايجان ميلتي بير ايل بويوندا ميلي سعادتي – آز زامان اولسادا – دادديلار.
او بير ايلده چوخلو ايشلر گؤروندو. دئمك اولار آذربايجانين ميلي حكومتي دونيا سويه سينده ميلي حاقلارين و ايستك لرين ايسته ين آپارتايد آلتيندا اولان ميلتلره اؤرنك اولدو.
بو حكومتين اساس ايشلريندن توركجه يازيب – اوخوما (آنا ديلينده يازيب اوخوما) ايمكانلارین يارادماق ايدي. اؤز آناديلينده يازيب – اوخوماغي حسرتده گؤره ن ميلت، چوخ ماراقلي، كيلاسلاردا ايشتيراك ائديردي، توركجه كيتابلار باسيليردي (چاپ اولوردو)، توكانلارين ويترين يازيلاري، كوچه لرين آدي و... توركجه يازيليردي. آما تاسف له آپارتايد و فاشيست سيستم (پهلوي رژيمي) بونو هده له ييب، آرادان آپارماق اوچون چوخ حيله كارليقلارا ال ووردو و نهايتده 1 ايل سونرا (آذر 1325) آذربايجانا قوشون چكيب و ارتش و بير سيرا لات و اوباش لار الي ايله آذر آيي نين 24-ونده آذربايجاندا سوي قيريما ال بولادي. او بو ايشه ده قانع اولماييب و آذر آيي نين 26 – سيندا تبريزين دانشسرا مئيدانيندا توركجه كيتابلاري آذربايجانين هر يئريندن ييغيب و اونلارا اود ووردو. آپارتايد سيستمي بو ايش ايله بئله دوشونوردو كي آذربايجاندان اؤز اينتيقامي ني آلير و 24 آذر سوي قيريميندان سونرا 26 آذر گونونده مدنيت سوي قيريميندا يولا سالددی. آما بوندان غافيل اولدولار كي هر كيتابين كولوندن بير آغاج بئجردي و ايللر بويو بويويوب و ميلت آراسيندا بوداقلاري داها چوخ کؤک لندی.
آذربايجان ميلتي يئنه ده اؤز حاقلارين آليب و قوروماق اوچون چاليشير و سسي گون به گون گوجلو شكليده آپارتايدين قولاغين كار ائتمكده دير.
آذربايجان ميلتي اؤزه لليكله اونون ميلي حركتينده چاليشان ميلتچي لر آذر آيي نين اوغورلارين قوتلاييب و فاشيست پهلوي سيستمي نين و اونون تؤره مه لري نين جينايتلرين اونودماييب و قول قولا و ال اله وئريب و داها گوجلو گله جه يه آدديم آتيرلار.
منجه 26 آذر اگر كيتاب يانديريلان گون اوچون آدلانسادا، بو گونده كيتاب سونما داها چوخ كئچميشده كي چاليشقانلاريميز (اؤزه لليكله آذر شهيدلرينه) سايغي بسله مك و يوللارينين آردين توتماق آنلامين دا اولا بیلر.
اؤنر اوچون بو گونده ميلتيميزين آراسيندا كيتاب سونماق ايله بير جينايتي خاطيرلاياق و بير ياخشي و مدني عنعنه ني ميلتيميزين آراسيندا يئرلشديرق.
اتک یازی:
1- كيتاب سونماق = كيتاب هديه وئرمك
26/9/1387
21 آذر حركاتي و سید جعفر پيشه وري
يازان: موگه چتین قایا
كوچوره ن: آيتان تبريزلي (آذراوغلو)
فارس ایشغالچیلاری ساريندان[1] تجاووزه اوغرایان[2] عزیز تورک یوردو گونئي آذربايجانین یاخین سیاسی تاریخینده اونودا بیلمه يیجی بؤیوک لیدئرلریندن بیری اولان سید جعفر پيشه وري نين میللی موباریزه ایچینده کی دارتيشيلماز اؤنمي ني قیساجا آنلاتمايا چالیشاراق اونو آنمايا[3] و آنلاماغا چالیشاجاغیق.
20-جي عصر گونئي آذربایجان سیاسی تاریخینه ایکینجی بؤیوک دامغانی ووراراق گونئي آذربایجان تورکلرینی 1 ایللیک آزادلیغا قوووشدوران بو اولو شخصیت هر شئیدن اول بوتون تورک دونیاسینین افسانه لیدئرلریندندیر. باغریندان میللی قهرمان چیخارمادا بنزرسیز اولان تورک میللتی نه قدر قهرمانلاری ، نه قدر كيمسه لري ایله دونیا تاریخینه يؤن[4] وئرمیشدیر.
سید جعفر پيشه وري ؛ 26 آگوست 1893 تاریخینده گونئي آذربايجانین خلخال شهریندکی زئیوه محلهسینده دوغولموشدور. فارس تجاووزچولرینین آغلا سیغماز اینسانلیق باسقي لاريندان و یاغمالامالاریندان چتين ليگه دوشن عائلهسی آذربايجانین قوزئي نه کؤچ ائتمک زوروندا قالمیشدیر. گونئي آذربایجان تورکلرینین اوز-اوزه قالدیغی فارس هوجوملاری هر ایستیقامتیله آراشدیریلماسی لازیم اولان شدت حادثهلریندندیر. كؤچ ائتمک زوروندا قالدیقلاری قوزئي آذربایجاندا دا تام دینجلیگی توتا بیلمهین پيشه وري ، اوشاق یاشلاردا عائلهسینین دولانیشیغینا ایشتیراک ائتمک اوچون ایشه باشلادی. دوغولدوغو تورپاقلاردان چیخاریلمانین آغریسینی روحوندا یاشایان پيشه وري ، سورگون حیاتینین ائتكي سي ايله گوجلنن و کؤک له شن میللی فیکیرلرینی هر شرطده ایفاده ائتمیش و میللیتی اوغروندا موباریزه وئرمیشدیر. هر تورک کیمی ایچینده گون ایشیغینا چیخاراق گليشمه يي[5] و ائتمهیه تؤکولمه یی گؤزلهین میللیتچیلیغی سرعتله جوجرمیش و گوجلنهره ک حرکته تؤکولموشدور..
بیر ياندان چالیشیب بیر ياندان اوخویان عزيم لي تورک پيشه وري ، میللی حاقلاری اوغروندا چالیشماقدان بیر آن بئله گئری دایانمامیش ، میللی موباریزه ایچینده آکتیو وظیفهلر گؤتورموشدور.
گونئي آذربایجان تورک ديره نيشي نين اونودولماز و یادسیناماز ایلک هوجومو ، قاباقجیل حرکتی اولان 1905 ستارخان حرکتینده آکتیو اولاراق سوروملولوق[6] ساحه ده، وظیفه ایجرا ائدن پيشه وري ؛ 1934-جو ایلده هر کسین معلومو اولان شخصلردن رضا پهلوي طرفیندن حبس اولونماسینا قدر چوخ اؤنملي میللی ایشلرده تانينميش دير. تورک دوشمنلیگی ایله تاریخه دامغا وورموش ، اينگیلیسلرله امکداشلیق ائدن فارس اصللی (آناسی و آروادی گونئي آذربایجان تورکودور) رضا پهلوي ، پيشه وري یه موختلیف ظلملرین تطبیق اولونماسیندا باش رول اوینامیش ، اونا تام اولاراق 11 ایل حبسخانادا اذیت چکدیرمیشدیر. دیلده دئييلن چوخ راحات 11 ایل حبسلیق. .گئنچلیغی فارس دوستاقلاريندا کئچن پيشه وري ادعاسیندان دؤنمه ين و ایچریده چؤلده یالنیز میللی موستقیللیگی اوچون موباریزه ائتمیشدیر.
تورک دوشمنی بیر-بیریندن قاللاش[7] سیاسی ایجادلارین اورتایا یاییلدیغی دؤورلرده تورک میللی حاقلارینی و تورکچولوغو قیشقیران پيشه وري ؛ بیر طرفدن فاشیزم ایله ، آيري ياندان كمونيسم ایله ده دؤیوش وئرمیشدیر. بعضی شعورو بولانیق و مقصدلری تورکلویه دوشمنلیک اولانلارجا 'سوسیالیست اولاراق اتهام ائدیلن پيشه وري یه بؤیوک بیر حاقسیزلیق ائدیلمکدهدیر. اگر او سوسیالیست اولسایدی "ميللي حوکومت دئییل" سوسیالیست حوکومت قوراردی. ايشلری ایله اؤزونو تورک دونیاسینا اثبات ائتمیش و تقدیر قازانمیش پيشه وري کیمی بیر تورک میللیتچیسینه سوسیالیست دامغاسی وورولاراق تحقیر ائدیلمهیه چالیشیلماسی ، تورک دوشمنلیگینین دیلدن قلمه آخماسیندان باشقا بیر شئی اولا بیلمز. اسیر تورکلرین تورکچولوق ائتمهسی اؤز قارداشلاری طرفیندن بئله حرام اولاراق گؤرولور و بير زامان لار سوسیالیست ، بير زامان لار رادیکال ايسلامچی اولاراق وصف ائدیلیرسه ده ، ایچینده اولدوغوموز دورومون دهشتلیلیگی اورتادادیر. او هر واخت تورکدن و تورکلوکدن یانا اولاراق چيزگي سي ني[8] تعیین ائتمیش ، قاتقیسیز بیر تورکچو اولاراق تورک دونیاسینین ایشیق كيمسه لريندن اولموشدور. دوشمنلری بونو قبول ائتمهسه ده او تورک دونیاسیندا ایز بوراخمیش بیر فیکیر و حرکت آدامیدیر.
پيشه ورينین ان بؤیوک اويغولامالاريندان[9] اولان هئچ شوبههسیز 1 ایل قدر سورن میللی حکومت دؤورودور. 21 آذر حرکتی اولاراق تورک سیاسی حیاتینا کئچن میللی حکومت دؤورهسی چوخ ايضطيرابلي اولموش ، مینلرله گونئي آذربایجانلی تورک میللیتچیسی حبس اولونموش ، فارس محکمهلرین طرفیندن چیخاریلان فتوالارلا ایران تورکلریندن میللی حاقلاری اوچون حاکمیت له ووروشانلارین ناموسلاری ، ماللاری ، جانلاری بیزه حالال دير دئییلمیشدیر. بئلهلیک له دینی قوتسال ليغا قازانان فارس تجاووزچولری گونئي آذربایجان تورکلرینین جانینا ، مالینا ، ناموسونا هوجوم ائتمکدن گئری دایانمامیش ، بونو دینی بیر امر کیمی یئرینه یئتیرمیشلر.
میللی حکومتین مین بیر چتینلیکله ، آخان نوو[10] کیمی تورک قانییلا قورولماسینین آردیندان اؤز يئرينده باغلانیلماسی و قانلی تورک قیرغینی ایله سونلاندیریلماسی ، فارس حاکمیتیندن سوروشولماسی لازیم اولان حسابلارداندیر.
1 ایل کیمی قیسا بیر زامان سونوندا گونئي آذربایجان تورکلرینین باشلاریندان یاغان بومبالارلا ، آرد-آردا گلن حبسلر ، دوستاق لارلا ، دار آغاجلاریندا یئللندیریلن تورک بدنلریله بئیینلردن سیلینمهیه چالیشیلان تورک باغيمسيز حرکتی ، ایشغالچی فارس حاکمیتینین 1944 اؤنجه كي و 1944 سونراسینداکی قانلی تورک قیرغینلاریندان اولاراق تاریخه کئچمیشدیر.
میللی حوکومتین داغیلماسینین آردیندان فارس اوردوسو طرفیندن تورک دیلی ايله یازیلمیش بوتون اثرلر ، نشریاتلار توپلانمیش و یاندیریلمیشدیر. جانلارینی ایتیرن گونئي آذربایجان تورکلری مدنیت تجروبهلرینی ده ایتیرمیشلر ایدی. گونئي آذربايجانین مشهور میللی شاعرلریندن صمد ووروغون، یاندیریلان مدنیت تجروبهلرینین آنيسينا[11] پاريس ده 1952-جی ایلده "يانديريلان كیتابلار " آدلی اثرینی دونیا باریش قورولتاییندا ایران فارس حاکمیتینه اعتراض اولاراق تقدیم ائتمیشدیر. فارس حاکمیتی تورکلرین جانینا قصد ائتمکله قالمامیش ، آدلارینی و دهیرلرینی یوخ ائتمک اوچون یازیلی یازیسیز اثرلرینه ، تجروبهلرینه ده گؤز تیکمیشدیر. ایران فارس حاکمیتینین سوی قیریمچیلیغینین یانینا كولتور[12] قيريم چيليغي ده کئچمهلی ، گونئي آذربایجان تورکلوغونون یاشادیغی آغریلار اونودولمامالیدیر.
میللی حکومت دؤوروندکی ایلک هوجوم تورک دیلینین رسمیئته قوووشدورولماسی ، تورک دیلی ایله یازیب اوخومانین حاکم قیلینماسی ایدی. بو هر شئ ایله تورک میللی بیرلیگینه قوووشمانین و باغيمسيزليغين گره كي ایدی. تورک دیلی ایله اؤرنیم وئرن مکتبلرین قورولماسی ، یوکسک مکتبلرین آچیلماسی چوخ اؤنملي آتیلیملار ایدی[13]. دیل ميلتين كيمليگي اولاراق تعیین ائدیجیدیر. دیل اینسانلارین معنوی وطنیدیر. 1944-جو ایلده قورولان گونئي آذربایجان تورک رئسپوبلیکاسي بئلهلیکله نه قدر وئريملي[14] و تورکچو آتیلاملار ائدجیینی گؤسترمیشدی. قاچار تورک دؤولتینی 1925-جی ایلده ییخاراق ايران تورکلرینی آزلیق حالینا گتیرن فارسلار ، ایشغال ائتدیکلری تورکلرین تورپاقلاری اوزرینده قورولان گونئي آذربایجان تورکلرینین باغيمسيزليغيني ییخماق اوچون ائتمدیکلری ظولمو بوراخمادیلار. بوتون دونیانین تانیشی و قبول ائتدیگی گونئي آذربایجان تورک رئسپوبلیکاسینی ییخماقدان چکینمهین فارس حاکمیتی ، دونیا قارشیسیندا فاشیزانلیغینی[15] و تورک دوشمنلیگینی اثبات ائتمیش اولاراق هله ده حؤکم سورمکدهدیر.
ايران آدلی اؤلکهده 35 میلیوندان چوخ تورکون آدی آنيلماز كن[16] اونلارین اوزرینده دالغالانان فارس بایراغی ظولمون و ایشغالچیلیغین گؤرونر تیمثالی اولاراق یئللنیلمکدهدیر.
گونش تورکدن یانا البته دوغولاجاق !
21/9/1387
[1] طرفيندن
[2] معروض قالان
[3] خاطيرلاماغا
[4] جهت
[5] اینکیشافی
[6] مسئوليت
[7] حقه باز
[8] خطّيني
[9] تطبیقلریندن
[10] نوودان، سو يولو
[11] خاطرهسینه
[12] مدنیت
[13] آدديم لا ايدي
[14] محصولدار
[15] فاشيست ليغيني
[16] خاطیرلانمازکن
قایناق:
قوربان بایرامینیز قوتلو اولسون
رحمتلیک مهندس غلامرضا امانی نین قیرخ یاس تؤره نی
جوما آخشامی اونون مزاری اوسته و مسجیده کئچیریلدی
ائلگون(شنبه) ١٦ آذر ۱٣٨۷ - ٦ دسامبر ۲۰۰٨
اؤیرنجی نیوز: جوما آخشامی (پجنشنبه) 14/9/1387 ساعات 9:30 دان مهندس غلامرضا امانی و اونون قارداشلارینین قیرخ یاس تؤره نی کئچیریلدی.
40 گون بوندان اؤنجه مهندس غلامرضا اماني 2 قارداشي ايله تبريز اهر يولوندا بير اتومبيل قضاسی ايله دونياسيني دئيشدي. مارالان مزارليغيندا قويلانيب و بو گون اونلارين 40 ياس تؤره ني مزاری اوسته كئچيريلدي.
آذربايجانين چوخلو شهرلريندن ميللي چاليشقانلاريميز بو تؤره نه قاتيليب و بيربيرينه و اماني عائيله سينه باش ساغليغي دئييب و هامي يا اؤزه لليكله اماني عائيله سينه دؤزوم ديله ییردیلر.
مراسيمده گونش خانيم (مهندس اماني نين حايات يولداشي) سؤزه باشلاييب و بير شعرده اوخودو. غلامرضا و قارداشلاري اوچون اورايا گلن لر آغيت دئييب و آغلاشديرديرلار.
سونرا عابباس بي ليساني دانيشيغا باشلاييب و آز دانيشيغيندا مهندس اماني نين شخصيتي و چاليشمالاري حاقدا بئله دئدي:
"مهنديس اؤلمه ييب، اونا گؤره كي بابك سولاله سيندن دير
اماني اؤلمه ييب، اونا گؤره كي عاشورا سولاله سيندن دير
اماني اؤلمه ييب، اونا گؤره كي ستارخان و پيشه وري سولاله سيندن دير.
من دئييرم شهيد غلامرضا اماني اونا گؤره يوخ كي بونلار نه جور اؤلوب لر، اونا گؤره كي جاني ايله،
فيكري ايله اؤز ميلتينه خيدمت ائتدي..."
بو سيرادا عابباس بي يين سؤزو بير نوحه خوانين نوحه سي ايله كسيلدي و داهادا مهنديسين فيكيرداشلارينا چيخيش ايمكاني وئريلمه دي. ميكروفون الدن اله نوحه اوخويانلار آراسیندا دولانيب بئله ليكله بو بير بهانه اولدو تا میللی فيكيرداشلارين دانيشيقلارينين قاباغي آلينسين.
ناهاردان سونرا ساعات 2:30 دان 5 –قده ر طالقاني مچيدينده (تبريزين منبع محله سينده) ياس تؤره ني كئچيريلدي.
دئمك لازيم دير چوخلو انتظامي و امنيتي مامورلار سحر چاغي مزار اوستونده و هابئله ناهاردان سونرا مچيدين اطرافيندا و ايچينده، ميللي فعال لاريميزي گؤز آلتينا آلميشديرلار . اونلار مچيدين ايچينده، توركجه پارچا يازيلارينا هئچ ايمكان وئرمه ييب و اؤز باشلارينا نئچه ايداره و شهرداري وريندن فارسجا پارچا يازيلاري ايله مچيدي بوروموشدورلر!
ایگیدلر اؤلمز
روحو شاد، یولو گئدرلی اولسون
قایناق: اؤیرنجی سایتی
http://oyrenci.com/News.aspx?newsId=5182
