بو سؤزلر، 1992،  25-26 فئورال گئجه سي، داشناکلارين ياراتديغي وحشت نتيجه سينده، آناسييلا برابر بيلينمز چؤللره قاچيب، جان وئرن کيچيک بير قيزين خاطيرينه و عيني گونلرده يازيلدي.  

  اونلار توپلاياراق اورکلرينه، يوز ايللرين کيچيگليک، قيسقانجليق و نيفرت دويغولاريني، چيرکين و مسموم آخينتيلار کيمي توپلاناراق بير يئری دونيانين دؤرد بير يانيندان،  دؤشلريندن آسيب اَن قارا خاچلاريني، قيجيرداديب ديشلري، هوجوم ائتديلر خوجالي يا اوچ يؤندن. يانديرديلار ائولري، اؤلدوردولر کيچيجيک ببه لري و داغيتديلار يوواسيني قارانقوشلارين. بير چوخلاري، گؤرونجه بو دهشتي، آچيق قالان دؤردونجو يؤندن  قاچاراق، چؤللرده، قيشين آجيماسيز شاخداسينا تسليم اولدولار. بو آرادا، روحوموزو ابديته قدر تيتره دن، 7 ياشيندا بير قيزين، آناسييلا برابر قار ايچينده دونماسي، سؤزوموزه سيمبول اولدو.  

  خوجاليدان قاچان کيچيک قيز!  

  خسته آنان،  

     بير وحشت کيمي دونياني بورويه ن،  

        شاخدالي گئجه نين قارانليغيندا،  

           قارا قارلارا بورونوب، جان وئررکن؛  

                سن بو دونياني نئجه گؤردون؟  

                        اينسانليغي نئجه دويدون؟  

  سن آنانين دوداغيندا،  

     چاره سيزجه دونوب، قالان،  

        سون تبسسومو گؤرونجه،  

          کيمسه دن بير ديلکده بولونماق ايسته دين مي؟  

  باخ بو چوخ ماراغليدير:  

     کيچيک اورگينده سنين او زامان،  

        وار ايدي مي ان کيچيک بير اوميد؟  

  خوجاليدان قاچان کيچيک قيز!  

      سون داملاسيني توکه ديب اوميدين،  

         دوشرکن،  

           قارا قارلارين بوزلو قارنينا،  

              بير سؤز اوچدو،  

                آذري تورکجه سينده،  

                  دونموش دوداغيندان  

                     و اينجه بير سس چيخدي،  

                        اينجه بوغازيندان.  

  هله ده او سس،  

    آناسين ايتيرن ياورو بير قوش کيمي،  

      گزيب، دولانير خوجالي نين پاسلي گؤيلرين.   

        هله ده او سس،  

          مني چاغيرير،  

           بيزي چاغيرير  

             و جومله اينسانليغا، هاراي  چکير:  

               هايدي قالخين!  

                 اوتانين دا قالخين!  

                   قانادلارينيز قيريليبسا،  

                       اينسانليق آدينا باري،  

                        بير ايکي،  

                          آخساق آدديم آتين!  

  خوجاليدان قاچان کيچيک قيز!  

        هله ده سنين سون نفسين،  

           بوزلاري اريدیب،  

            دَلمکده دير حیرصلی گؤيلري   

  سارخانلي پاشا/ فئورال 1992